估唔到喺呢個充滿黃金單身女貴族嘅香港，我身邊竟然仲有二個富二喺無女朋友！
C先生係典型高富帥，鄰居係劉德華，身邊女人貨如輪轉但係就永遠都拍唔到拖；A先生係某大地產集團主席個細仔，代步只有跑車，34歲都只係拍過一次3星期嘅Long Distance拖。二子本身就優秀，並非遊手好閒嘅浪蕩公子，咁究竟點解仲係單身狗？
「咁多個女人之中，我最鐘意嘅都係你個ex Nicky，真性情好多。」全部友人一致認同。
「不過我屋企人唔鐘意呀麻...」C先生平靜表示。
我忍唔住好大聲講咗句:「嘩，而家咩年代呀？」
亦有一次我同A傾計，我又八掛問佢:「點呀？近排有無遇到一啲心儀對像先？」
「都有嘅...」
「咁你唔約下佢？唔試唔知喎！」
「唔…又唔可以太求其嘅，首先要爹哋媽咪都鍾意... 我要保持住個血統嘛。」
「血統…?!」我笑到停唔到。「睇黎你啲血真係藍色㗎喎...哈哈」
我發現兩位公子都各有共通點: 佢哋手執幾間公司又見識廣闊，正值黃金時段創意無限；但係對於自己嘅人生大事，佢哋竟然好concern父母對女仔嘅喜惡，擇偶權全部掌握喺父母手中 - 佢自己會搵，亦會愛得好深，但係結婚嘅一個，多數係父母睇中嘅一個。
TVB劇情大家都睇得多，作為”大嫂”，除咗要周旋於家族企業風波同服待一眾長輩之外，仲要”工”成身退為家庭”息影”，專心生兒育女全力經營好一個家庭。必要時亦要出席各大場合，要有禮儀品味學識要表現大方得體。大嫂係撐起成個”後宮”嘅重心，你好難想像大嫂行出黎嘅形象係一個得打扮花姿招展嘅性感尤物，又或者係一個超級事業型嘅女強人。
上一代白手起家嘅父母親當然期望子承父業，肩負起家族承傳嘅責任，所以對身邊嘅人亦都特別謹慎。我亦識得新加坡富二孖仔廿歲出頭，大哥女朋友醫科系畢業後然後想演話劇，細佬女朋友喺空姐。佢哋父母大概覺得啲女仔唔夠登對，拍拖半年後兩子被父母阻止戀情，話如果唔同呢兩個女仔分手嘅話會逐佢哋出家門。於是最後大哥分咗手，細佬地下情。我自己聽完都覺得好可惜。
所以要做”大嫂”，唔單止係嫁比一個自己愛嘅男人，仲係嫁咗比成個家族奉獻了全部。
父母口中嘅「竹門對竹門，木門對木門」，大指身家、學歷、地位都要通通一致，而我哋呢一輩嘅對門，反指兩個人嘅性格興趣，同價值觀是否相近。相近嘅價值觀係非常重要，意味著溝通得宜，先係幸福嘅基本。
我都曾經一度認為，由於唔想我將來嘅另一半嫌棄我low，所以不停進修、不停增值，藉著不停嘅進步，希望可以將自己提升到另一個層次；然後過多幾年我嘅心態有轉變，充實自己並唔係為咗別人，而係為咗自己；時代在變、生活在變，點可能永遠停留喺某一點？或者我仍然稱唔上係個有內涵嘅人，但我可以肯定自己一定唔係個膚淺嘅人。外貌係女性嘅資本，但唔係你立足社會嘅根，亦唔會令你得到別人永遠嘅尊重。
女人最大嘅悲劇就係幻想將錢，感情，幸福都聚集喺一個男人身上。而其實女人嘅歸宿除咗係今生所愛，仲可以係夢想，自由同堅持嘅理想。
共勉之。
#想過優質生活還是靠自己吧
#如果需要介紹富二兩子可以PM我
Search